Et doeërt nog waal effe, maar vuuër daste ‘t wits is ’t zondig 2 meëts 2025 en precies op deë daag is ‘t Vasteloavendszondig. De lede van ’t Feskomité Sjeeter Dialekmès zint al druk bezig mit de vuuërbereiding van die mès. Ieër kint uch nit vuuërsjtelle wat me allemaol mot regele vuuërdat zoeng mès kint weëde opgedrage in de P&P-kirk op d’r Sjeet.
Um te beginne motte vieër ee thema bedinke, wao alle tekste in de mès betrekking op hant. Vieër wille de luuj tensjlotte och ing boodsjap mitgeëve. Dis kieër hant vieër bedach dat d’r oeëtsjproak “Kump good” ôs genog aaknopingspunte gieët um de boodsjap van d’r Hergot, mit hij en doa inne kwinksjlaag, uuëver te bringe.
Ing vasteloavendsmès oane moeziek is nieks en dat hilt in dat vieër, graat wie in anger joare, och op zeuk motte noa artieste, die get sjun leedjes wille zinge. Ôs vaste “hoeszangeres” Marleen Rutten wil samen mit Ivo van der Bijl ee paar leedjes kome zinge. D’r zint nog mieë zangers en moezikante die aan de mès wille mitwirke, maar dat vertelle vieër uch later waal.
Zoeë ziet ‘r leef luuj, bij ’t organizere en plenne van de traditionele Dialekmès vuuër vasteloavendszondig, kump gans get kieke. Maar vieër kinne noen al zaage dat de mès durchgeet. Dus sjrieëf maar in ugge agenda dat ieër op zondig 2 meëts 2025 um 11 op 11 in de kirk va Petrus en Paulus op d’r Sjeet mot zieë. ’t Feskomité vruijt zich noa al um uch dan wer te zieë.
