Ga naar de inhoud
« Alle Evenementen
15e Sjeeter Dialekmès
15e Sjeeter Dialekmès
Op zondig 15 fibberwaar is ´t wer zoeë-wiet. Vuuër de vieftieënde kieër hoate vieër op d’r Sjeet ôs eege Dialekmes in de Petrus en Pauluskirk an de Hoofsjtroat op d’r Sjeet. Als thema hat ’t Feskomité Sjeeter Dialekmès gekoaze vuuër: Versjtoat uch, want ’t leëve is “Vuuels te moeëj”. Echte kenners onger uch weëte dat d’r tekst tussje de aanhalingstekes d’r titel is van ee leedje van Thei & Marij. Dit zangduo, in Limburg en wiet doa boeëte bekint van vöäl dialekleedjes (o.a. t’Veldboeket), kunt dit joar de Sjeeter Dialekmès mit ee aantal leedjes oploestere. Behalve van hùn leedjes kint ieër och geneëte van de leedjes en klanke van de Palemiger Spatzen, die twieë joar geleije och al in de Dialekmès zint geweës en dat toen biezonger good bevalle is.
De boodsjap die vieër wille uuëverbringe in dees mès hat betrekking op de ummer mieë um zich hin grieëpende intolerantie en vregelerij tussje de luuj. Loate vieër ôs in godsnaam beëter versjtoa, zoeëwaal letterlik es figuurlik, want ’t leëve is vöäl te sjun um te verdoeë mit sjtriet en onbenullighede.Zoeë wie jidder joar is de kirk al vreug oape, zoeë ronk hôf tieën en vanaaf tieën oeër is d’r al moeziek en gezank in de kirk, onger angere van d’r zenger 45Elf (Edwin Peelen). In de mès zinge Thei & Marij hun leedjes en spieële en zinge de Palemiger Spatzen sjtummige vasteloavendsmoeziek. De vaste gezange weëde ―wie geweunlik― gezonge durch de mansluuj van ’t Gregoriaanse Koeër (die missjien och nog waal ee extra leedje zinge)
Went alles gezaag, gezonge, gesjpilt en gebeënd is, pakke vieër ôs noa d’r zeëge van pastoer in ’t Parochiezeëlke ing poefel of nonnevot en drinke ôs doa get bij (en dat alles vuuër nieks, oane te betale). In ’t zeëlke zörgt d’r Rene Slapak op ziene Steirische Harmonika vuuër de echte vasteloavendssjtimmung.
Dus sjrieëf in d’r agenda: Vasteloavendszondig 15 fibberwaar, 11 op 11, Dialekmes op d’r Sjeet in de parochiekirk va Petrus en Paulus. En kom op tied, want mieëstal is ’t druk in de kirk. Verklije is gewünsjt, zoeëdat ’t ing bonte verzameling van luuj weët in de kirk.
Beleeëfd oeëtnuëdigend,
Feskomité Sjeeter Dialekmes.
Feskomité Sjeeter Dialekmes.