Dialekmès wer ee groeët sukses De Dialekmès op vasteloavendszondig woar, zoeë wie jidder joar, wer erg druk. De kirk woar tot de letste plaatsj gevuld en d’r sfeer woar geweldig. Vuuër de mès zörgden d’r Raymond en d’r Marcel Kortis (Duo Kortiszonen) en d’r René Slapak mit ziene Steirische Harmonika vuuër ing geweldige sjtumming. Dit joar how ’t Feskomité, dankzij d’r Erik Stevens, deë och lid is van ’t Fekomité, de Palemiger Spatzen zoeëwiet gekriege dat zieë d’r moeziek onger de mès wole verzörge. Och ’t Marleen Rutten woar –al wer vuuër de viefde kieër– present um ee paar van zieng sjunste leedjes te zinge. Behalve ozze ege Prins Bjorn I en Jeugprins Ian I van d’r Schaesbergse Vasteloavends Verein, woare och de pas oetgerope Prinses Bo I van CV De Spinneköpkes, Prins Frank I van CV Ieëre Road De Sjweëgelsöppers en Prinses Monique I van de Parkstad Böck in de kirk. Och angere vasteloavendsvereine zoeë wie d’r Prinse Road Schaesberg en d’r Road van Elluf va VV Schaesberg howwe d’r wèg noa de kirk gevonge. Weë de Palemiger Spatzen al ins hat zieë optreëne, deë vroag zich missjien aaf of dat waal goot zow goa in ing vasteloavendsmès i g’n kirk. Deë angs woar evver onterech, want de junge hant zich erg igehôte en hant hieël ingetoge hunne moeziek gesjpild. De boodsjap van de mès woar d’r hartekreet “Höb uch leef, estebleef” en de lede van ’t Feskomité hope dan och dat die boodsjap goot is uuëver gekoame en och jiddere daag in praktijk weët gebrach. Aal mit aal woar ut ing sjtummige en sjun mès, die hat loate zieë, dat vöäll luuj van d’r Sjeet ummer noch werm loope vuur de tradisie um de dreij vasteloavendsdaag aa te vange mit ‘t vroage um d’r zeëge van ozze Hergod. En wat och opvool, woar dat vöäl luuj verklijd noa de mès zint gekome. ’t Deed ôs vruijd dat ummer mieë vasteloavendsgekke op vasteloavendszondig sjun verklijd noa de Dialekmès kome. ‘t Feskomité Sjeeter Dialekmès wil op dees plaatsj nog ins alle luuj bedanke die op welke maneer dan och mitgewirkt hant aan ut sjlage van de Dialekmès van 2024. Vieër hope um nieëchs joar wer ing sjun mès te kinne organizere en vieër hoope nog mieë verklijde luuj in de Petrus en Pauluskirk te mage begroete. Feskomité Sjeeter Dialekmès