| Ut woar wer sjun Ozze Hergot hat zich vas en zieëker gevruijt mit vasteloavendszondig toen Heë de Sjeeter Dialekmès hat gezieë en gehoeët, want de kirk zoot sjtampvol en d’r sfeer woar geweldig. De twieë artieste – Marleen Rutten en Ivo van der Bijl – hant prachtige leedjes gezonge en bij hun duetten woar d’r toch waal inne klik tussje die twiee. Me merkte ’t al an de luuj, wie ze de kirk i kome: jidderinne sjtroalde vruijt en plezeer oeët. De sjtumming woeët durch 45elf (Edwin Peelen) en de sjpaskapel Mit De Moel D’r Aa al gauw op ’t richtige niveau gebrach. Dat woar good te merke toen de Hoeëghede noa binne woeëte geleijd. Onger de toeëne van d’r Feswiesspolka koame de leden en d’r aanhang van d’r Schaesbergse Vasteloavends Verein noa binne, mit vuurop ozze Sjtadsprins Marco I en Jeugdprins Kay I. Ze woeëde gevolgd durch CV De Spinneköpkes mit in hun midden de pas oeëtgerope Prinses Femke I. Wie jidderinne zieng plaatsj how gevonge, koeët de mès beginne. ’t Thema van de Dialekmès van dit joar woar Kump Good en veuël luuj goave de lede van t Feskomité noa de mès komplimente uuëver de sjoeën tekste, die good aasjloate beij ’t thema. Natuurlik woar de preëdig van pastoer, zoeë wie jidder joear, wer ee hoeëgtepunt, gans op rijm en perfect aagepast an ’t thema. Dat d’r Hergot ’t good mit ôs vuuër how, bleek och noa de mès. ’t woar prachtig weer en zelfs zoeë werm en zonnig, dat ’t nit nuuëdig waor ing tent vuuër ’t zeeëlke op te zette. Al mit al woar ’t ing geweldige ervaring um zoeëveuël luuj in zoeng gow sjtumming in de kirk te zieë. Jidderinne sjoenkelde en zong mit beij de leedjes die bekint woare. Zelfs de kleintjes, die in de mès woare, vôlte zich zoeë op hun gemak, dat ze noa ’t priesterkoeër opkome en och wer rujig truuk gonge noa hun ôwesj in de kirk. ’t Feskomité Sjeeter Dialekmès wil op dees plaatsj nog ins alle luuj bedanke die mitgewirkt hant um van de Dialekmès wer ee groeët sukses te make. De komplimente hant ôs gesjterkt in de overtuiging dat vieër good werk hant gelieëverd en hant ôs gemotiveerd um och nieëchs joar wer ing sjun mès te organizere. Vieër hope dan och nog mieë verkleijde luuj in ôs kirk te mage begroete. Feskomité Sjeeter Dialekmès |